ممكن افضفض

السلام عليكم ,,

وحشتوني اوي يا اجمل ناس ف الدنيااا

الصراحه انا من فتره واناعايزه اتكلم ومش عارفة اتكلم لمين

او مين يسمعني يعني لحد ماطفرت بيا وقلت اقولكم انتوا بقى

بس الاول هقول ع شوية حجات وبعدين احكي ..

اول حاجه ان مجلة ميكانو الحمدلله صدرت وتقدروا تشوفوها ع الويب سايت بتاعها www.mikanoo.com

وانا ليا فيها مقال وماسكه باب جوا الجون مع مايكل :)

تاني حاجه المدونة امبارح العصر كده بقت كويسه وعرفت ادخل ع التعليقات وكل حاجه وفتحت لوحه التحكم بس دلوقتي المدونات التانيه مش بتفتح اساسا ولا الكومنتس بردوا وانا الحمدلله مسيفه صفحة الارسال دي وسبحان الله احتجتلها وعرفت اكتب اهو

تالت حاجه بجد ياريت تعذروني واقسم بالله انا لحد امبارح كنت متابعه كله بس مش عارفه ارد عشان الكومنتس قفلت تاني ده حتى الكومنتس عندي مش عارفه ارد عليها

رابع حاجه بقى .. ادعوا لاختكم عشان انا بتغير اوي وبغير حواليا حجات كتير والحمدلله للاحسن بس في حجات محتاجه مني جهد اكبر ومحتاجه دعاكم اوي ,,

خليني احكي بقى ..

بما اني ثانوية عامه وكده يعني حاسة اني لازم اقولكوا حكايتي مع الثانوي كلها اصلا

عشان انا شايفه ان في ناس حاطين عليا امل وكده ومستغربين اني مش بذاكر :)

بصوا انا انسانه كنت بعشق الدراسه بشكل اهبل طلعت من الابتدائي الاولى ع المحافظه كنت جايبه 100% و ف اعدادي كنت من اوائل اسوان وبعدين بقى جيت هنا الثانوي

اولى ثانوي كانت بالنسبالي جحيييييييييييم ف كل حاجه جيت متأخره عن الدراسه شهر ونص ومش متعوده ع نظام مواد الدين الكتير ده للاسف فمواد الدين نزلتني جامد

تانيه بقى عشقت المدرسه بمعنى الكلمه كنت لو اطول ابات فيها هبات لدرجة اني ف الشتا كنت باخد معايا الدفايه :)) والله العظيم كنت بعشق المدرسه وبحب كل المواد ماكنتش بغيب لو بمووووت وجبت 98,2 وده عشان ماكنتش بذاكر بضمير وعادي ببدي مثلا اي حاجه ع المذاكره لاني من النوع الي ماعرفش اقعد اذاكر كتير يعني يادوب كده مره واحده .. كبيري اوي مرتين :)) والصبح قبل ما ادخل اللجنه

تالته ثانوي بقى جاتلي عقدة من لاشئ كرهت كل المدرسه واهملت ف كل حاجه وكنت بغيب بالعبيط وماعنديش ولا دفتر لاي ماده الا الاحياء وزودها بقى المدرسه بتاعت الرياضه الفصل كله كان بياخد دروس :(( كانت تغيب شهر وترجع تدينا فصل كااااااامل (شابتر يعني) ف حصه واحده وياريتها بتعرف تشرح دي بقى حصلي معاها مشكله كبيييره اوي وقررت بعدها اني أأجل السنة .. وقعدت ف البيت وكان فاضل ع انتهاء المدارس شهرين او اقل ..

صحيح خليني اقولكم ع نظامنا الاهبل ابن ال,,,,,,,,,,,

احنا طبقوا علينا حاجه كده اسمها اختبار القدرات ومع انه مشكله ف حد ذاته بس مش دي المصيبه بتاعتنا
المصيبه اننا خلوا عندنا حاجه اسمها فترات وحاجه تاني اسمها النسبة الموزونه :S يعني تلاته ف واحد كأننا فيران تجارب قدرات وفترات ونسبة موزونه

1- القدرات : امتحان بنمتحنه بعد انتهاء امتحنات اخر السنه وده بقى امتحان ف كل حاجه وبيعتمد ع الذكاء وسرعة البديهة ومليان فيزيا ورياضه عاااااا والاكزام ده بيخسف بناس الارض وبيرفع ناس تاني كانت مخسوفه :( عليه 30% من النسبة بتاعتنا يعني انا لو جبت 100% من غير القدرات هيبقى كأني جايبه 70% وده عشان دولتنا الجميله ترتاح وصدرها ينشرح والجامعات الضغط عليها يقل

2- الفترات : دي بقى المصيبه عندنا 11 ماده تخيلوا ياناس كل مانخلص فصل ف اي ماده نمتحن امتحان من عشره خلصنا مثلا الفصل الاول ف الاحياء نمتحن بعده هيكون الفيزيا ع الكيميا ع الماث ومش بنخلص :(( احنا كل ما نخلص من واحد نلاقي الفصل التاني خلص ف ماده تانية .. ده احنا لحد يوم السبت الجاي ده في امتحان مع ان حفلة التخرج بتاعتنا بكره بس ماتفهموش الغباء ده ليه :( عمالين نمتحن لحد ماتعبنا بجدددد ويوم مايكونش في امتحان تلاقي الفصل كللللللللله غايب !! وكل مدرسه بدماغها بقى واحده تاخد اتنين اتنين وتجمعهم وتقسم ع اتنين وتحط المتوسط وواحده تاخد احسن درجتين وتحطهم ع حسب مزاجها المهم يبقى عندها نتيجة امتحانين :S يعني بس اتنين بسسسس واحنا طول السنه بنمتحن :((

3- النسبة الموزونه : هقولكوا مثال وانتوا هتفهموا .. الرياضيات 7 حصص ف الاسبوع امتحان الرياضيات نقصت درجه اضربيها ف سبعة :( .. يعني مش مرحوميييييين بجد تخيلوا حتى الربع درجه تبقى بكام :S .. والحكايه دي شامله امتحانات الفترات ودرجات اعمال السنه من مشاركه ودفتر وحضور وغياب ( اه ماحنا عندنا اعمال سنه) وامتحانات الفاينل وخد عندك بقى الفيزيا مثلا 4 حصص وهكذا باقي المواد

شفتوا الغلب يعني كل ده وكماااان مطالبين بدفتر وحجات غريبه كده ولازم نكمل وعبطططططططططططططططط :S

ده النظام الي متطبق علينا بجد عقد عقد

المهم نرجع لتالته ثانوي للمره التانيه .. رحت نفس مدرستي بعد ما المدرسه الي قدمتلها قالوا مابنقبلش مصريات ههههههههههههه ورجعت مدرستي بعد ما اتأكدت ان الي هتدينا ماث هي الي درستني ف تانيه ثانوي المهم السنادي معدية ع خير وكان كل حاجه ماشيه تمام لحد ايييه

بابا قالي ف مره لما شافني بتكلم ع القاهره والجامعه والدنيا قالي لو جبتي مجموع يطلعك وزيره مش هخليكي ف القاهره وحدك :)
يمين شمال مانفعش معاه اي كلام وده ابويا وصعيدي ومادام حلف يعني افقدي الامل .. ففعلا فقدت الامل اني ادخل كليه اعلام حلمي او السن او اي كلية كبيرة .. وعرفت ان مصيري ف اسوان مع قرايبي والناس دي وبما ان اسوان مافيهاش كليه كبيرة الا هندسة وانا بجد عندي عقدة من كل الارقام والحاجات بتاعت الرياضه دي فمستحيل ادخل هندسة ومافيش الا هي اداب انجليزي يعني حتى صحافه مافيش .. فمكبره دماغي عشاااان انا ومغمضه هجيب مجموعها :)

مش بذاكر ومش عايزه اذاكر ومش مستاهله اني اتعب نفسي واحت واتنيل وانا عارفه مصيري فين :)
دلوقتي بقى بابا طالع ف حدوتة تاني .. عايز يخليني انتساب ف اي حاجه وخلاص وبيقولي انتي اهم حاجه مؤهل وبس انما انا ابقى مجنون لو سبتك وحدك ف مصر .. مع ان خالتي وجدتي هيعيشوا معايا ف بيتنا واسوان كلها اصلا امان وعيلتنا منتشره ف الشارع الي ساكنين فيه يجي 5 من عمامي وعماتي :S
فانا بقى جالي احباط زياده ع الاحباط ومنفضه اخر حاجه خاااااااااااالص بجد وقلتلهم لو فيها انتساب يبقى مش داخله القدرات وهقعد بالثانوية :(

واوحش حاجه حصلتلي ف ده كله ان ابويا مش مؤمن بيا ولا وبطموحي ولا عايز يشوف انا نفسي ابقى ايه اقوله عايزه اكبر يقولي انا عايزك صغيره :( .. بجد تعبت نفسيا وزهقت ومالييش الا انتوا دلوقتي

اسفه اسفه اسفه اني طولت اوي كده :(

واستحملوني انا والله مش عارفه ارد ع اي حد

سلام